Raila Odinga wabaye uwa kabiri mu matora ya Perezida muri Kenya, yatanze ikirego mu rukiko rw'ikirenga cyo kuburizamo ibyavuye mu matora y’Umukuru w’iki gihugu.

Ni nyuma y’aho akanama k'amatora ka Kenya katangaje ko William Ruto ari we watsinze amatora ku majwi 50.5%, mu gihe Raila Odinga bari bahanganye yagize amajwi 48.8%.

Itsinda ry'abanyamategeko bamwunganira ryavuze ko icyo kirego cyamaze gutangwa ku rubuga rwa internet, ndetse Umunyamategeko uri mu bagize itsinda ryunganira ihuriro Azimio la Umoja rya Odinga, yabwiye ibitangazamakuru byo muri Kenya ko bari mu nzira berekeza ku rukiko rw'ikirenga i Nairobi gutanga n'inyandiko z'icyo kirego.

Umunyamategeko akaba n'umunyapolitiki Daniel Maanzo yavuze ko icyo kirego cyo kuburizamo ibyavuye mu matora cyamaze kugera mu rwego rw'ubucamanza rwa Kenya; gusa avuga ko kopi y'iki kirego iza guterwaho kashe, itangwa mbere y'igihe ntarengwa cy'isaha ya saa munani z'amanywa (14h) ku isaha yo muri Kenya, ni ukuvuga mbere ya saa saba (13h) ku isaha yo mu Rwanda no mu Burundi.

Hagati aho, abashyigikiye Odinga bateraniye hanze y'inyubako y'Urukiko, aho abapolisi babarirwa mu magana bashyizeho ahatagomba kurengwa, ni mu gihe Umunya-Kenya uwo ari we wese utaranyuzwe n'ibyavuye mu matora ya Perezida, na we ashobora gutanga ikirego mu rukiko cyo kuburizamo ibyayavuyemo.

Dosiye ya Odinga yongerewe imbaraga no kuba bane mu bakozi bakuru (abakomiseri) b'akanama k'amatora barimo n'umukuru wungirije wako, Juliana Cherera barafashe icyemezo cyo kwanga kwemeza ibyavuye mu matora.

Ni mu gihe mu mwaka wa 2017, Urukiko rw'ikirenga rwa Kenya rwahinduye impfabusa ibyavuye mu matora ya Perezida ruvuga ko yabayemo inenge, rutegeka ko hakorwa andi matora mu gihe kitarenze iminsi 60; aho uwari Perezida Uhuru Kenyatta yaje gutsinda ayo matora asubiwemo, nyuma yuko Odinga yari yanze ibyavuye mu matora.