Kuri uyu wa Gatatu tariki 05 Ukwakira 2022, Perezida w'Urukiko rw'Ibanze rwa Nyagatare, Bwana Usengimana Augustin yakiriye indahiro z’Abunzi b’imwe mu Mirenge y’aka Karere, aho kahize muri rusange kuzakemura ibibazo bazakira ku kigero cya 98%.

Abarahiye ni abunzi 462 bo mu Mirenge ya Nyagatare, Karangazi, Tabagwe, Rwempasha, Musheri, Matimba na Rwimiyaga ibarizwa mu Ifasi y'Urukiko rw'Ibanze rwa Nyagatare, mu gihe hari abandi 70 bo mu murenge wa Katabagemu uri mu Ifasi y'Urukiko rw'Ibanze rwa Ngarama barahiriye inshingano kuwa 4/10/2022, naho abandi Bunzi bo mu Mirenge ya Kiyombe, Karama, Mukama, Gatunda, Rukomo na Mimuli iri mu Ifasi y'Urukiko rw'Ibanze rwa Gatunda bazarahira ku wa Gatanu tariki 07 Ukwakira 2022.

Mu izina ry'Umuyobozi w'Akarere, Umunyamabanga Nshingwabikorwa w'Akarere ka Nyagatare, Bwana Hategekimana Fred, yashimiye abunzi bemeye inshingano anabizeza ubufatanye bw'ubuyobozi bw'Akarere mu kuzuza izi nshingano zo kunga abaturage no kubakemurira ibibazo, hirindwa ko hari umuturage warengana.

Yakomeje avuga ko muri uyu mwaka wa 2022/2023, Akarere kahize gukemura ibibazo bizakirwa n'Abunzi ku kigero cya 98%, anavuga ko nk’ubuyobozi babitezeho kongera ubumwe n'imibanire myiza y'abanyarwanda binyuze mu bwunzi no kugabanya ibibazo bisiragiza abaturage bajya mu Nkiko bakahatakariza ubukungu.

Muri uyu mwaka wa 2022, mu Mirenge 14 igize Akarere ka Nyagatare hatowe Abunzi 840, mu gihe mu mwaka wa 2020/2021 n'uwa 2021/2022 Abunzi bakiriye ibibazo 1364 babikemura ku kigero cya 97.5%; ni ukuvuga ko bakemuye ibibazo 1330; ni mu gihe kandi muri aka Karere Komite z'Abunzi zarangije manda zishimirwa ko zakemuye ibibazo bakiriye mu gihembwe cya mbere cy'umwaka wa 2022/2023 ku kigero cya 99%.

Amwe mu yandi mafoto yaranze uyu muhango: