Igisirikare cya Ukraine kimaze kwisubiza km² 6,000 muri uku kwezi kwa Nzeri
Perezida Volodymyr Zelensky wa Ukraine yavuze ko abasirikare b'iki gihugu bafashe ahantu hanini kurushaho bahambuye Uburusiya, mu gihe bakomeje igitero cyabo cyo kubwigaranzura.
Zelensky yavuze ko muri uku kwezi kwa cyenda(Nzeri) abasirikare ba Ukraine bafashe ubutaka buri ku buso bwa kilometero kare (km²) zirenga 6,000 babwambuye Uburusiya, mu burasirazuba no mu majyepfo.
Uburusiya bwemeye ko bwatakaje imijyi ikomeye mu majyaruguru ashyira uburasirazuba bw'akarere ka Kharkiv, mu cyo inzobere mu bya gisirikare zibona nk'ishobora kuba intambwe ikomeye muri iyi ntambara; gusa bukavuga ko gusubira inyuma kw'abasirikare babwo muri ako karere mu minsi ya vuba aha ishize ari ukwisuganya, mu ntego yo kwibanda ku turere twa Luhansk na Donetsk two mu burasirazuba bwa Ukraine.
Ibi Uburusiya buvuga byasuzuguwe n'imbere mu Burusiya, bamwe mu bakoresha imbuga nkoranyambaga bo mu Burusiya bavuga ko ibyo bivugwa ko ari ukuhava biteye isoni, ni nyuma y’aho mu mpera y'ukwezi kwa gatatu(Werurwe) abasirikare b'Uburusiya ubwo babigeragezaga, bananiwe gufata umurwa mukuru Kyiv.
Avugana na BBC ku wa Mbere tariki 12 Nzeri 2022 nimugoroba, Mason Clark, wo mu kigo cyo muri Amerika cy'ubushakashatsi ku ntambara, Institute for the Study of War (ISW), yavuze ko ibi ari ‘ugukwira imishwaro [kwirukanka kw'abasirikare batsinzwe] kwuzuye kw'abasirikare b'Uburusiya, dore ko ngo byabaye ngombwa ko basiga ibikoresho byinshi byabo.’
Ni mu gihe kandi ku wa mbere nijoro, Minisitiri w'ububanyi n'amahanga w'Amerika Antony Blinken yavuze ko abasirikare ba Ukraine bateye intambwe ikomeye mu gitero cyabo cyo kwigaranzura Uburusiya, ariko yongeraho ko hakiri kare guteganya uko bizarangira.
Yagize ati: "Abarusiya baracyafite abasirikare benshi muri Ukraine hamwe n'ibikoresho n'intwaro n'amasasu. Bakomeje kubikoresha nta kurobanura atari gusa ku basirikare ba Ukraine ahubwo no ku bikorwAremezo bya gisivile nk’uko twabibonye".
Tariki ya 24 Gashyantare 2022, nibwo Perezida w'Uburusiya, Vladimir Putin yategetse abasirikare b'iki gihugu kugaba igitero gisesuye kuri Ukraine, ni mu gihe kugeza Uburusiya bukigenzura hafi kimwe cya gatanu (1/5) cy'ubutaka bwa Ukraine.
