Umukinnyi wo hagati w’ikipe ya Juventus yo mu Butaliyani, Paul Pogba, yatangaje ko yibasiwe n'ubwambuzi hamwe no gushyirwa ku nkeke ashyirwaho ibikangisho n'igico cy'abagizi ba nabi, aho ngo babikora babishaka kandi babigendereye.

Uyu mukinnyi wo hagati wa Juventus n'ikipe y'igihugu y'Ubufaransa, ku Cyumweru tariki 28 Kanama 2022 yasohoye itangazo abinyujije ku banyamategeko be, avuga ko icyo kibazo yanakimenyesheje abayobozi, nk’uko ibiro ntaramakuru AFP, byasubiyemo amagambo y'uwabihaye amakuru, binavuga ko Polisi y'Ubufaransa yatangiye iperereza.

Ni mu gihe mbere, Mathias Pogba, umuvandimwe wa Paul Pogba, yari yashyize videwo ku mbuga za internet asezeranya abantu ko agiye gutangaza ibyahishwe bikomeye kuri uyu mukinnyi, anavuga ko ayo makuru ashobora kugira ibyo anyeganyeza(ahungabanya), ariko ntiyagira ibindi bisobanuro atanga.

Muri videwo ze, Mathias Pogba yagize ati: "Isi yose, hamwe n'abafana b'umuvandimwe wanjye, ndetse cyane cyane ikipe y'Ubufaransa na Juventus, abakinnyi bakinana n'umuvandimwe wanjye n'abaterankunga be bakwiye kugira ibintu bimwe bamenya".

Yanavuze ko ibyo byahishwe bizanavuga kuri Rafaela Pimenta, ushinzwe gushakira isoko Pogba.

Itangazo rigira riti: "Byiyongera ku nkeke n'amagerageza y'ubwambuzi bikozwe n'igico cy'abagizi ba nabi cyibasiye Paul Pogba. Inzego zibifitiye ububasha zo mu Butaliyani no mu Bufaransa zabimenyeshejwe mu kwezi gushize kandi nta bindi bitangazwa bijyanye n'iri perereza rikomeje [gukorwa]".

Paul Pogba, w'imyaka 29, yatwaye igikombe cy'isi ari kumwe n'ikipe y'igihugu y'Ubufaransa mu 2018, yerekeje muri Juventus muri Manchester United mu mpeshyi y'uyu mwaka nk'umukinnyi warangije amasezerano.