Kayonza: Global GLOW igiye guhuriza hamwe abakobwa 510 biga ku burenganzira bwabo
Tariki 10 kugeza tariki 12 Kanama 2022, mu Murenge wa Rwinkwavu uherereye mu karere ka Kayonza, hagiye kubera ihuriro ryiswe ‘2022 Glow Summit’, aho biteganijwe ko rizabera kuri Ready for Reading, isanzwe ikorera muri uyu Murenge wa Rwinkwavu.
Ni igikorwa kirimo gukorwa ku bufatanye n’umuryango mpuzamahanga wigenga wa Global GLOW, aho bateguye ihuriro ry’abakobwa babarizwa muri gahunda zitandukanye za GLOW Clubs aho biga kwikorera ubuvugizi, Healthy GLOW biga ubuzima bw’imyororokere, ndetse na Girl Solve biga kwihangira umurimo, aho basanzwe bakorera mu Mirenge ya Rwinkwavu, Mukarange, Musha, ndetse na Bugesera.
Biteganijwe ko abakobwa 510 bazahurira muri iri huriro ryiswe “2022 GLOW SUMMIT”, aho bazigiramo ibikorwa bitandukanye birimo kwiga amasomo ajyanye n’ihame ry’uburinganire, ibijyanye n’uburenganzira bw’umwana w’umukobwa, amasomo ajyanye n’ihohoterwa rishingiye ku gitsina, ndetse n’uburezi bw’umwana w’umukobwa.
Global GLOW ni umuryango mpuzamahanga wita ku mwana w’umukobwa umwigisha uko yakwitwara ndetse akaba yagira uruhare mu mpinduka nziza z’aho atuye, mu gihe Ready for Reading ari umuryango utegamiye kuri reta ukorera mu Murenge wa Rwinkwavu mu karere ka Kayonza, ufite ibikorwa bikubiyemo isomero ndetse n’ikigo cy’amaguhurwa, ukaba ubumbatiye ibikorwa bitandukanye birimo gahunda z’abakobwa babarizwa muri Global GLOW nk’umufatanyabikorwa.
