Itariki y’amatora ya Perezida wa Kongo-Kinshasa yamenyekanye
Mu gihe kuri ubu umutekano mucye wibasiye uburasirazuba bwa Repubulika iharanira ya Demokarasi ya Kongo(RDC), kubera imitwe myinshi y'inyeshyamba, akanama k'amatora muri iki gihugu katangaje ko amatora ya Perezida azaba ku itariki ya 20 Ukuboza 2023.
Ibiro ntaramakuru AFP byatangaje ko Umuyobozi w’akanama k’amatora muri RDC, Bwana Denis Kazadi, yemeye ko umutekano mucye ukomeje kubaho mu bice bimwe by'igihugu uzatuma bigorana gukora amatora mu bwisanzure, muri demokarasi no mu mucyo; ariko avuga ko abategetsi biyemeje gukurikiza ingengabihe y'amatora.
Ni mu gihe Ibiro ntaramakuru Reuters byasubiyemo amagambo y'umuvugizi wa leta ya DR Congo Patrick Muyaya agira ati:
“Si ikibazo cyo kuganira ku matariki ntarengwa ateganywa n'itegekonshinga, ni ikibazo cy’uko twebwe tuyubahiriza no gushimangira demokarasi yacu".
Muyaya yagereranyije ko aya matora azatwara leta miliyoni hafi 600 z'amadolari y'Amerika, ni ukuvuga agera kuri miliyari 650, uyavunje mu mafaranga y'u Rwanda.
Perezida Félix Tshisekedi uri ku butegetsi muri iki gihe, yabugezeho bwa mbere muri Mutarama 2019 asimbuye Joseph Kabila, ari nabwo bwa mbere hari habayeho isimburana ku butegetsi mu mahoro; yanamaze kuvuga ko aziyamamariza manda ya kabiri.
