Ikipe ya Gisagara Volleyball club mu bagabo na RRA Volleyball club mu bagore, nizo zegukanye ibikombe mu irushanwa rya Gisaka Open Volleyball Tournament ryateguwe n’Akarere ka Kirehe, risozwa kuri iki Cyumweru tariki 21 Kanama 2022.

Gisaka Open Volleyball Tournament yatangiye ku wa Gatandatu tariki 20 Kanama 2022, igamije kuzamura impano z’uyu mukino mu Karere ka Kirehe n’utundi bihana imbibe, ndetse ubuyobozi bw’aka Karere busezeranya ko rigiye kuba ngarukamwaka.

Mu bagabo ryitabiriwe n’amakipe arindwi, mu bagore ryitabirwa n’amakipe atandatu yiganjemo asanzwe akina shampiyona ya Volleyball mu Rwanda.

Mu bagabo, igikombe cyegukanwe na Gisagara VC nyuma yo gutsinda REG VC amaseti atatu ku busa, ikipe ya Kirehe VC itahana umwanya wa gatatu itsinze IPRC Ngoma; ni mu gie mu bagore, RRA VC yegukanye umwanya wa mbere nyuma yo gutsinda APR VC amaseti atatu kuri imwe, umwanya wa gatatu wegukanwa na Ruhango VC itsinze IPRC Huye.

Perezida w’Ishyirahamwe rya Volleyball mu Rwanda, Ngarambe Raphael, yashimiye ubuyobozi bw’Akarere ka Kirehe bwahisemo guteza imbere uyu mukino, avuga ko irushanwa ryagenze neza, anizeza ubufatanye mu kuzamura impano z’abakiri bato muri uyu mukino.

Ni mu gihe Umuyobozi w’Akarere ka Kirehe, Bwana Rangira Bruno, we yavuze iri rushanwa ryaherukaga kuba mu 2019, bagiye kujya baritegura buri mwaka, mu rwego rwo gufasha abakiri bato kuzamura impano zabo.

Rangira ati: "Turashimira abitabiriye irushanwa rya Gisaka Open Volleyball Tournament 2022. Wari umwanya mwiza wo guteza imbere impano ziri mu mukino wa Volleyball no gushimisha abaturage. Iri rushanwa rizakomeza gutegurwa buri mwaka."

Amakipe yegukanye ibikombe yahembwe 600,000 Frw kuri buri imwe, aya kabiri ahembwa 500,000 Frw, mu gihe aya gatatu yahembwe 400,000 Frw.